X
egov

You are here

«Халықты жұмыспен қамту мәселелері» сұрақ-жауаптар

Алматы облысы Қапшағай қаласынан 1 отбасы өңірлік квотаға енгізіліп, ШҚО-ға қоныс аударды.   Қоныс аударғаннан кейін, бағдарламаға қатысушылар қатарына қосылып, әлеуметтік келісім шарт жасалды. Бағдарламаға қатысушы көшуге субсидия тағайындауға өтініш білдірген уақытта, Жұмыспен қамту орталығының директорының атына тағы бір өтініш білдірді.

Жауап: 

«Жұмыс күшінің ұтқырлығын арттыру үшін адамдардың ерікті түрде қоныс аудару қағидаларын бекіту туралы» Қазақстан Республикасы Денсаулық сақтау және әлеуметтік даму министрінің 2016 жылғы
14 маусымдағы № 515 бұйрығына сәйкес Тұрғын үйді жалдау (жалға алу) және коммуналдық қызметтерге ақы төлеу бойынша шығыстарды өтеу мен көшуге субсидия беру
нысанында отбасы мүшелері, туыстық қатынасы және туған жылы көрсетіледі. Осыған орай, мемлекеттік қолдау қаражатын егер де өтініш беруші – отағасының шот нөмірінде проблемалар туындап жатса, онда қаражатты басқа отбасы мүшелерінің шотына аударуға болады деп есептейміз.

 

Сұрақтың нөмірі: 353138
29 қараша, 2018 - 16:53 өзгертілді

Мемлекеттік мекемелерде техникалық қызметшінің орны босаған жағдайда бос орынға жұмыссыз азаматтарды жіберуге негіз қайдан алуға болады.

Халықты жұмыспен қамту орталықтары жоқ ауылдық округтердегі бос жұмыс орнына ауылдық округ әкімінің ұсынысы негізінде жұмысқа жіберу қаншалықты дұрыс.

Тұрақты немесе уақытша  жұмысқа жолдаған жағдайда жұмыссыздар есебінде тұрған адамдардың кезектілік сақталуы қажет пе немесе жолдама беруге болама? Әлде ол ақылы қоғамдық жұмысқа жібергенде ғана сақталуы тиіспе?

Жауап: 

Құрметті Нұрлыбек!

«Халықты жұмыспен қамту туралы» Қазақстан Республикасының Заңына (бұдан әрі – Заң) сәйкес мемлекет халықты жұмыспен қамтуға жәрдемдесу бойынша шараларды қамтамасыз етеді.

Заңға сәйкес, Халықты жұмыспен қамту орталығы (бұдан әрі – Орталық) жұмыс іздеп жүрген адамдарға және жұмыссыздарға лайықты жұмыс таңдауда жәрдемдеседі, жұмысқа орналасу үшін жолдама береді, сондай-ақ тегін әлеуметтік кәсіптік бағдарлау бойынша қызметтер көрсетеді.

Орталық бос жұмыс орындарының (бос орындардың) есебін жүргізеді.

Сондай-ақ, жұмыс іздеп жүрген адам тұрғылықты жерi бойынша халықты жұмыспен қамту орталығында не «электрондық үкіметтің» веб-порталы арқылы жұмыс іздеп жүрген адам ретінде тіркеледі.

Қоғамдық, әлеуметтік жұмыс орындары және жастар практикасы – уақытша жұмыс орындары.

Баяндалғандарды ескере отырып, егер Сіз уақытша жұмыс орнына орналасқан кезде жұмыссыз ретінде тіркеуде болып, тұрақты жұмысқа орналасқан жағдайда жұмыссыз ретінде тіркеуден шығарыласыз.

Сондай-ақ, жұмыс берушi мемлекеттік қызметшілердің, мемлекеттік сайланбалы қызметтердің, Парламент және мәслихаттар депутаттарының, Қазақстан Республикасы судьяларының, әскери қызметте тұрған адамдардың, арнаулы мемлекеттік, құқық қорғау органдары мен мемлекеттік фельдъегерлік қызмет қызметкерлерінің, Қазақстан Республикасы Ұлттық Банкі және оның ведомстволары жұмыскерлерінің бос лауазымдарын қоспағанда, бос жұмыс орындарының (бос лауазымдардың) бар екендігі туралы мәліметтерді еңбек жағдайлары мен төлемақысын көрсете отырып, олар пайда болған күннен бастап бес жұмыс күнi iшiнде халықты жұмыспен қамту орталығына жазбаша түрде немесе «Еңбек биржасы» мемлекеттік интернет-ресурсы арқылы жiберуге міндетті.

Сонымен бірге, 2018 жылғы қаңтардан бастап республикада Электрондық еңбек биржасы жұмыс жасайды. Барлық бос жұмыс орындары туралы деректерді қамтитын www.enbek.kz сайтынан лайықты жұмыс қарап, резюме орналастырып немесе жұмыспен қамтудың жекеше агенттіктерінің қызметін пайдалануға болатынын хабарлаймыз.

 

Сұрақтың нөмірі: 352885
9 қараша, 2018 - 16:00 өзгертілді
Жауап: 

Құрметті Алима Аскаровна!

Қазақстан Республикасы Еңбек кодексінің (бұдан әрі – Кодекс) 38-бабына сәйкес жұмыскерді басқа жұмысқа ауыстыру:

1) жұмыскер жұмысының (еңбек функциясының) өзгеруі, яғни жұмысты басқа лауазым, мамандық, кәсіп, біліктілік бойынша орындау;

2) еңбек шартында келісілген еңбек жағдайлары (жалақы мөлшері, жұмыс уақыты мен тынығу уақытының режимі, жеңілдіктер мен басқа да жағдайлар) оны орындау кезінде өзгеретін өзге жұмысты тапсыру;

3) жұмыс берушінің оқшауланған құрылымдық бөлімшесіне ауыстыру;

4) жұмыс берушімен бірге басқа жерге ауыстыру жұмыскерді басқа жұмысқа ауыстыру болып табылады.

Кодексте көзделген жағдайларды қоспағанда, жұмыскерді басқа жұмысқа ауыстыруға жұмыскердің келісімімен жол беріледі, ол еңбек шартына тиісті өзгерістер енгізумен және жұмыс берушінің актісімен ресімделеді.

Осыған орай, жұмыскерді мекеме ішінде хатшылықтан әдіскерлікке ауыстыру жұмыскердің келісімімен және еңбек шартына өзгерістер енгізу арқылы жүзеге асырылады.

 

 

 

Мен 2017 жылы Қазақстанға Қытайдан келген оралманмын. 2018 жылдың ақпан айында Үржар ауылына тұрақты мекен-жайға тіркелдім. 2018 жылдың қыркүйек айында оралмандарды қабылдаудың өңірлік квотасына еніп, тұрақты мекен жайым бойынша Жұмыспен қамту орталығына барып, Нәтижелі жұмыспен қамту бағдарламасы бойынша көшуге және үйді жалдауға субсидия алуға өтініш білдірім.

Жауап: 

Саламатсыз  ба,  Кәмила!

Қазақстан Республикасы Үкіметінің 2016 жылғы 29 желтоқсандағы № 919 қаулысымен бекітілген, "Еңбек" нәтижелі жұмыспен қамтуды және жаппай кәсіпкерлікті дамытудың 2017 – 2021 жылдарға арналған бағдарламасының үшінші бағытының (Еңбек ресурстарының ұтқырлығын арттыру) іске асырылу тетігі  «Жұмыс күшінің ұтқырлығын  арттыру үшін адамдардың ерікті түрде қоныс аудару қағидалары» (бұдан әрі – Қағидалар) арқылы жүзеге асады және реттеледі.

            Осы  Қағидалардың  42-тармағының 2-абзацына сәйкес, көшуге субсидиялар, тұрғын үй жалдау (жалға алу) және коммуналдық қызметтер бойынша шығыстарды өтеуге субсидиялар қабылдау өңірінде тұрақты тіркелген сәттен бастап алты айдан кешіктірмей өтініш берген жағдайда беріледі.

            Егер субсидия алуға өтінішті көрсетілген мерзімнен кешіктіріп тапсыратын болса,  оны қарастыру Қағидаларға қарсы келетінін қосымша хабарлаймыз.

Сұрақтың нөмірі: 351752
21 қыркүйек, 2018 - 20:42 өзгертілді

1 сұрақ: 2016 жылы 2 отбасы оралмандарды қабылдаудың өңірлік квотасына енгізіліп, «Жұмыспен қамту 2020 жол картасы» бағдарламасы аясында көшуге субсидия алса, 2017 жылы  5 отбасы «Нәтижелі жұмыспен қамту және жаппай кәсіпкерлікті дамытудың 2017-2021 жылдарға арналған бағдарламасы» аясында  көшуге және тұрғын-үйді сатып алуға субсидия

Жауап: 

Құрметті Сеилхан Каирканович!

Еңбек, әлеуметтік қорғау және көші-қон комитеті Сіздің хатыңызды қарап, келесіні хабарлайды.
1 және 2-сұрақтар бойынша
«Халықтың көші-қоны туралы» Қазақстан Республикасы Заңының 23-бабының 6-тармағына сәйкес оралмандарды қабылдаудың өңірлік квотасына енгізілген оралмандарға және олардың отбасы мүшелеріне Қазақстан Республикасының Үкіметі айқындаған өңірдің шегінен тыс жерге өзінің ерік қалауымен бес жыл ішінде өз бетінше көшіп-қонған не Қазақстан Республикасының азаматтығын алудан бас тартқан жағдайларда, Қазақстан Республикасының халықты жұмыспен қамту туралы заңнамасына сәйкес жұмыспен қамтуға жәрдемдесудің белсенді шараларына қатысушыларға көзделген, өздері алған мемлекеттік қолдау шараларын мерзімінен бұрын толық көлемде өтеуге міндетті.
«Жұмыс күшінің ұтқырлығын арттыру үшін адамдардың ерікті түрде қоныс аудару қағидаларын бекіту туралы» Қазақстан Республикасы Денсаулық сақтау және әлеуметтік даму министрінің 2016 жылғы 14 маусымдағы № 515 бұйрығының (бұдан әрі - Бұйрық) 8 - тармағына сәйкес әлеуметтік келісімшарттың талаптарына сәйкес Бағдарламаға қатысушы (отбасымен бірге) қоныстандырған жерінен бес жыл ішінде кетіп өз міндеттерін орындамаған жағдайда, кеткен күнінен бастап он екі ай ішінде көшуге берілетін субсидияның және тұрғын үй жалдау (жалға беруге) және коммуналдық қызметтерге ақы төлеу бойынша шығыстарды өтеуге берілетін субсидияның алынған сомасын республикалық бюджетке қайтарады.
Яғни, Бұйрыққа 2018 жылғы 14 маусымдағы № 242 енгізіген өзгерістер мен толықтыруларға сәйкес Бағдарламаға қатысып субсидиялар ретінде мемлекеттік қоладу шараларын алған оралмандар мен отбасы мүшелеріне қоныстандырған жерінде бес жыл тұру шарты өзгертілмеген, сондай-ақ қоныстанған жерінен кетіп өз міндеттерін орындамаған оралмандарға кеткен күнінен бастап он екі ай ішінде мемлекеттік қолдау шаралары ретінде берілген субсидиялар сомасын республикалық бюджетке қайтару нормасымен толықтырылған.
Сонымен қатар, Бағдарламаға қатысушының отбасы мүшелерінің бірі қоныстандырған жерінен кеткен жағдайда, кеткен отбасы мүшесі алған көшуге берілетін субсидия сомасы бюджетке қайтарылады.
Сондай-ақ, Бағдарламаға қатысушының отбасы мүшелерінің бірі қоныстандырған жерінен әскери қызметке шақырылған, осы елді мекенде тұруға мүмкіндік бермейтін сырқаттанушылықты, жұмыс берушінің өтінімі бойынша басқа жерге оқуға жіберілген жағдайларда көшуге берілетін субсидия сомасы бюджетке қайтарылмайды.
Сонымен бірге, Бағдарламаға қатысушы мемлекеттік қолдау шараларын көрсетуге жұмсалған мемлекет шығыстарының сомасын ерікті түрде, ал бас тартқан жағдайда сот тәртібімен республикалық бюджетке қайтарады.
3-сұрақ бойынша.
Мемлекттік қолдау шаралары ретінде берілетін субсидиялар Нәтижелі жұмыспен қамтуды және жаппай кәсіпкерлікті дамытудың 2017 – 2021 жылдарға арналған бағдарламасы шеңберінде жүзеге асырылады.
Осыған орай, еңбек ресурстарының ұтқырлығын арттыру бойынша Бағдарламаның қатысушылары болып Қазақстан Республикасының азаматтары және оралмандар болып табылады.
Сондықтан, көшуге субсидиялар, тұрғын үйді жалдау (жалға алу) және коммуналдық қызметтерге ақы төлеу бойынша шығыстарды өтеуге субсидияларды төлеу тәртібі «Жұмыс күшінің ұтқырлығын арттыру үшін адамдардың ерікті түрде қоныс аудару қағидаларын бекіту туралы» Қазақстан Республикасы Денсаулық сақтау және әлеуметтік даму министрінің
2016 жылғы 14 маусымдағы № 515 бұйрығымен жүзеге асырылады.
Сондықтан бұйрықтың 42 – бабының 3 абзацында көрсетілген норма оралмандар мен қоныс аударушыларға қолданылатынын мәлімдейміз.

Құрметті Мәдина Ерасылқызы!

Жауап: 

Құрметті Ертуған Алмасұлы!

Нәтижелі жұмыспен қамтуды және жаппай кәсіпкерлікті дамыту бағдарламасына сәйкес «Қазақстан Республикасында зейнетақымен қамсыздандыру туралы» Қазақстан Республикасы Заңының 11-бабының 1-тармағында белгіленген зейнеткерлік жасқа жетпеген халықты жұмыспен қамту орталықтарында тіркелуіне қарамастан жұмыссыздар, өзін-өзі жұмыспен қамтыған адамдар, кәсіпкерлік әлеуеті бар жұмыс істеп тұрған және жұмысын жаңадан бастаған кәсіпкерлер, ауыл шаруашылығы кооперативтері және олардың мүшелері, шаруа және фермер қожалықтары Бағдарламаға қатысушылар болып табылады.
Халықаралық еңбек ұйымының (ХЕҰ) стандарттары мен әдіснамалық тәсілдеріне сәйкес жалдамалы қызметкерлер - еңбек ақы, сыйлық ақы, үстеме ақы және т.с.с. немесе заттай нысанда ақы төлеу (сыйақы) қарастырылған жалдану шарты бойынша жұмыс істейтін адамдар, ал өзін-өзі жұмыспен қамтыған қызметкерлер – бұл жалдану бойынша жұмыспен қамтылмаған, өндірілген тауардан немесе көрсетілген қызметтен табыс немесе пайда табу үшін өз-өзіне жұмыс істейтін тұлғалар.
Осыған орай, мемлекеттік мекемелерде және кәсіпорындарда жалдамалы ретінде жұмыс істейтін, әрі дара кәсіпкер болып тіркелген азаматтар жалдамалы жұмыскерлер болып табылады.

Сұрақтың нөмірі: 348867
30 наурыз, 2018 - 16:30 өзгертілді

Қызылорда облысы,Қазалы ауданы әкімдігінің Халықты жұмыспен қамту орталығының 2018 жылдың 1 қаңтарынан бастап берілген штаттағы бір топ қызметшілердің еңбек ақысын төлеудегі орын алған қиындықтарды көрсете отырып,заңдылығын айқындап берсеңіздер.

Жауап: 

Құрметті Сүлеймен Нұрланұлы!

   Қазақстан Республикасының Еңбек кодексінің 1-бабына сәйкес азаматтық қызметші – бұл Қазақстан Республикасының заңнамасында белгіленген тәртіппен қазыналық кәсіпорындарда, мемлекеттік мекемелерде ақы төленетін штаттық лауазымды атқаратын және олардың міндеттері мен функцияларын іске асыру, мемлекеттік органдарға техникалық қызмет көрсетуді жүзеге асыру мен олардың жұмыс істеуін қамтамасыз ету мақсатында лауазымдық өкілеттіктерді жүзеге асыратын адам.

   Мемлекеттік мекемелер және қазынашылық кәсіпорындар жұмысшыларының еңбекақы төлеу жүйесі «Азаматтық қызметшілерге, мемлекеттік бюджет қаражаты есебінен ұсталатын ұйымдардың қызметкерлеріне, қазыналық кәсіпорындардың қызметкерлеріне еңбекақы төлеу жүйесі туралы» Қазақстан Республикасы Үкіметінің 2015 жылғы 31 желтоқсандағы № 1193 Қаулысымен (бұдан әрі – Қаулы) анықталады.

   Қаулының 4-тармағына сәйкес тиісті қызмет салаларындағы уәкілетті органдар еңбек жөніндегі уәкілетті мемлекеттік органмен келісу бойынша тиісті қызмет салалары бойынша азаматтық қызметшілер лауазымдарының тізімдерін бекітеді.

   Осылайша, әлеуметтік қамсыздандыру саласындағы лауазымдар тізімі «Әлеуметтік қамсыздандыру саласының азаматтық қызметшілері лауазымдарының тізілімін бекіту туралы» Қазақстан Республикасы Денсаулық сақтау және әлеуметтік даму министрінің 2015 жылғы 28 желтоқсандағы № 1042 бұйрығымен бекітілген, бұл бұйрыққа сәйкес «ассистент» лауазымы D звеносымен анықталған.

   Қаулының 3-тармағына сәйкес ұйымдар қызметкерлерінің лауазымдық еңбекақысы (тарифтік мөлшерлемесі) атқаратын лауазымдарының функционалдық блоктарға жатқызылуына және мамандығы бойынша жұмыс өтіліне, тағайындалған біліктілік разрядтарына (жұмысшылар үшін) қарай  (тарифтік мөлшерлемесі) есептеу үшін бекітілген тиісті коэффициенттерді осы қаулының 1-тармағы бірінші бөлігінің 1) тармақшасында белгіленген базалық лауазымдық айлық мөлшеріне көбейту жолымен айқындалады, қазіргі таңда оның мөлшері 17697 теңгені құрайды.

   Азаматтық қызметшілердің, мемлекеттік бюджет қаражаты есебінен ұсталатын ұйымдар қызметкерлерінің, қазыналық кәсіпорындар қызметкерлерінің (жұмысшыларды қоспағанда) функционалдық блоктар бойынша лауазымдық айлықақыларын есептеуге арналған
коэффициенттері қаулының 2-қосымшасымен анықталған.

   Қаулының № 6-қосымшасында халықты жұмыспен қамту орталықтарының басшыларына, мамандарына және басқа қызметшілеріне жұмыстың күрделілігі мен қауырттылығы үшін лауазымдық айлықақының  50 % көлемінде үстемеақы ақы белгіленген.

   Азаматтық қызметшілер, мемлекеттік бюджет қаражаты есебінен ұсталатын ұйымдардың қызметкерлері, қазыналық кәсіпорындардың қызметкерлері үшін бірыңғай қосымша ақылар мен үстемеақылар Қаулының № 18 – қосымшасында белгіленген.

   Сонымен қатар, хатта сұрақ толық көрсетілмеген. Осыған байланысты, аталаған мәселе бойынша Сізге толық жауап беру мүмкін болмады.

   Егер Сіз сұрақтарды толықтырып қайта хат жазған жағдайда, Сізге толық жауап берлетін болады.

 

Сұрақтың нөмірі: 348335
20 ақпан, 2018 - 12:47 өзгертілді

Сәлеметсізбе.Мен Жүсіпбек Рысбек Рамазанұлы Қызылорда облысы, Қазалы ауданы, Әйтеке би кенті тұрғынымын. Көпбалалы отбасынан шықтым. 2017 жылы Орал қаласындағы Жәңгір хан атындағы БҚАТУ ды "Мемлекеттік және жергілікті басқару" мамандығы бойынша қызыл дипломға бітірдім. Жеке басымның жетістіктері жетерлік. Дүниежүзінің 34 мемлекеті кіретін "ӘЛЕМ ХАЛЫҚТАРЫ ЖАЗУШЫЛАРЫ ОДАҒЫНЫҢ" мүшесімін. Онға жуық кітаптың авторымын. "Весидж.

Жауап: 

Құрметті  Рысбек Рамазанұлы!

   Сізді жұмысқа орналастыру мақсатында Қызылорда облысының жұмыспен қамтуды үйлестіру және әлеуметтік бағдарламалар басқармасына (бұдан әрі - Басқарма) хат жолданды. Басқарманың ақпаратына сәйкес қазіргі таңда «мемлекеттік және жергілікті басқару» мамандығыңыз бойынша Қазалы ауданындағы мекемелер мен кәсіпорындардан сұраныстар түспеді.

   Мамандығыңыз бойынша мекемелер мен кәсіпорындардан  сұраныс түскенше ақылы қоғамдық жұмысқа қатысу ұсынылды. Алайда қатысудан Сіз бас тарттыңыз.

   Сондай-ақ тұрақты жұмысқа орналасу мәселесі бойынша Қазалы ауданы әкімінің жеке қабылдауында болдыңыз, Сізге мекемелер мемлекеттік қызметке конкурс жариялаған кезде қатысу керектігі  түсіндірілді.

   Сонымен қатар, Министрліктің www.enbek.kz сайтындағы «Жұмыс» порталында жұмыс берушілердің дербес мәліметтері негізінде уәкілетті органдар ұсынған тұрғылықты өңіріңіздің еңбек нарығындағы бос жұмыс орындарының көрсеткіштерімен танысуға, сондай-ақ өз мамандығыңыз бойынша жұмысшылардың кәсібі (мамандары) мен қызметкерлердің жұмысы тізбесінен таңдау мүмкіндігі бар екендігін мәлімдейміз.

Сұрақтың нөмірі: 348159
16 ақпан, 2018 - 20:30 өзгертілді

Сәлеметсізбе! Менің  әкем 2017 жылғы қыркүйек айының 27 жұлдызынан бастап зейнеткерлікке шыққан. "Зейнетақымен қамтамасыздандыру туралы" ҚР Заңының 16 бабының 2 тармақшасында көрсетілгенге сәйкес, ай сайынғы төленетін зейнетақыны есептеуге 3 жылғы жұмыс кезеңінің табысын қолдану арқылы айқындалады деп жазылған. Аудандық зейнетақы төлеу орталығына, зейнетақыны есептеу кезеңіне 2014 жылдың шілде айынан 2017 жылдың маусым айын қоса алғанда аралығын көрсетіп құжаттар тапсырған болатынбыз. Алайда шаруа қожалығынан 2017 жылға түскен табысын зейнетақы есебіне қоспаған.

Жауап: 

Құрметті Алмас Беркімбайұлы!

«Қазақстан Республикасында зейнетақымен қамсыздандыру туралы» ҚР Заңына сәйкес азаматтардың 1998 жылдың 1 қаңтарына дейінгі еңбек өтілі мен  1995 жылғы    1 қаңтардан бастап қатарынан кез келген 3 жыл жұмыс үшін орташа айлық табысы зейнетақы төлемдерін тағайындау кезінде негізгі көрсеткіштер болып табылады.

Сонымен қатар, 1998 жылғы 1 қаңтардан кейінгі кезеңдегі табыстардан мiндеттi зейнетақы жарналары ұсталып, бірыңғай жинақтаушы зейнетақы қорына аударылған жағдайларда ғана орташа айлық табыстан зейнетақы төлемдерінің мөлшері есептеледі.

Бұдан басқа, мiндеттi зейнетақы жарналарын, міндетті кәсіптік зейнетақы жарналарын төлеудің толық және уақтылы жүзеге асырылуын бақылауды Қазақстан Республикасының заңнамасына сәйкес мемлекеттік кіріс органдары жүзеге асырады.

Арнаулы салық режимін қолданатын шаруа немесе фермер қожалықтары міндетті зейнетақы жарналарын салық кезеңінің әрбір айы үшін есептейді және оларды шаруа немесе фермер қожалығының кәмелетке толған мүшесінің (қатысушысының) пайдасына бірыңғай жинақтаушы зейнетақы қорына аударады.

Сіздің қолыңыздағы барлық құжаттарды толық зерттеп, талдау жасау үшін  тұрғылықты мекен-жайыңыз бойынша Еңбек, әлеуметтік қорғау және көші – қон комитетінің Департаментіне жолығуыңызды ұсынамыз.

Сұрақтың нөмірі: 346757
1 қараша, 2017 - 14:53 өзгертілді

Қазақстан Республикасы Үкіметінің 2017 жылғы 13 ақпандағы № 52 «Облыстық бюджеттердің, Астана және Алматы қалалары бюджеттерінің 2017 жылға арналған республикалық бюджеттен "Өрлеу" жобасы бойынша шартты ақшалай көмекті ендіруге берілетін ағымдағы нысаналы трансферттерді пайдалану қағидаларын бекіту туралы» қаулысы 2017 жылдың 1 қаңтарынан бастап қолданысқа енгізіледі делінген. Осы қаулыға сәйкес «Өрлеу» жобасына қатысушы үміткер тұрғылықты жері бойынша жұмыспен қамту орталығына немесе кент, ауылдық округі әкіміне жүгінеді .

Жауап: 

Сәлеметсізбе! Бүгінгі күні Өрлеу жобасының жүзеге асырылуы және шартты ақшалай көмекті (бұдан әрі – ШАК) көрсетудің тәртібі «Облыстық бюджеттердің, Астана және Алматы қалалары бюджеттерінің 2017 жылға арналған республикалық бюджеттен "Өрлеу" жобасы бойынша шартты ақшалай көмекті ендіруге берілетін ағымдағы нысаналы трансферттерді пайдалану қағидаларын бекіту туралы» Қазақстан Республикасы Үкіметінің 2017 жылғы 13 ақпандағы № 52 қаулысымен (бұдан әрі – қаулы) реттеледі. Аталған жоба пилоттық болып табылады және 2014 жылдан бастап жүзеге асырылуда. Жыл сайын оның пилоттық іске қосылуы жаңа нысандағы атаулы әлеуметтік көмекті кең ауқымды көрсету және сәйкес құқықтық актілерге өзгерістер енгізу үшін бизнес-процесстерді жасауға мүмкіндік береді. Аталған қаулының аясында ағымдағы жылы ШАК көрсету параметрлері өзгертілді, нақтырақ айтсақ, құжаттар Халықты жұмыспен қамту орталықтары арқылы қабылдана басталды.

Сонымен бірге, құжаттардың қабылдануы ассистенттер мен консультанттар арқылы жүзеге асырылатын болады. Проектті пилоттық түрде жүзеге асырудың 3 жылы ішінде бұл адамдарды жұмыспен қамту және әлеуметтік бағдарламалар бөлімдерінің құзыретті мамандары үйреткен.

Осылайша, аталған өзгерістер жаңа нысандағы АӘК кедергісіз енгізуге мүмкіндік береді. 

Сұрақтың нөмірі: 343898
25 сәуір, 2017 - 20:24 өзгертілді

Беттер

ҚР тәуелсіздік жылдарындағы жетістіктері
Қазақстанда іске асырылып жатқан үздік әлеуметтік жобалар
«Еңбек жолы» Республикалық конкурсы
Еңбек дағдыларын дамыту және жұмыс орындарын ынталаңдыру
Жаңа ұлттық қызметтер жіктеуіші